在變的世界

舊年比個 friend 提醒，要同時代並進，改吓個 look，蒲吓啲「IN」啲嘅商塲，了解多啲年青人日常用語，識番啲流行歌，睇吓啲雜誌報紙最「潮」嘅野，探索吓出面個世界發生緊乜事，買個 i-pod寫番個 blog，剪個形頭啦。

所以過往一年你哋就見倒我騎騎呢呢，有啲變左，重以為我有病，患左後現代腦刺激抗拒老餅綜合症候羣添。其實我日日見客，太「專業」同「嚴肅」好似少左一份「情」；太「古老石山」同啲客溝通唔多唔少有啲障礙；同啲年青朋友傾偈又有層隔漠，若因外觀、談吐而比人覺得喺 "alien"就敝啦。從前靠套老西同條呔「証明」比客人睇我喺專業人仕，而家唔需要啦，眼神+聲調+技術已可說服他們了!

好，拿拿林揼左副江澤民超大眼鏡，「泥」往頭上撻，「中」入去嗰啲黑媽媽嘅 boutique 睇吓啲年青人鍾意啲乜東東？哦，啲衫尾要攝出嚟o架？裏面個件要長個外面o架？鋪裏面咁黑都差啲睇唔倒件衫係乜野顏色，好似穿窿個播？唔知點解啲音樂咁嘈，啲 lighting 又閃閃吓，眼都花哂，好似入左 disco，都冇晒 mood 買野，個 sales 重喺度好似賣年宵咁：睇啱邊款出聲，隨便睇隨便揀........行近門口重未走佢就嗌：下次再嚟睇過.........我重以為開左部錄音機。有次重尷尬，呢啲鋪好多鏡牆，一喺迷路，一喺差啲撞崩個頭；啲衫又叠起晒，叫人點揾點試呀，又驚整亂佢，睇完又費事同佢摺番；重唔分男女裝，睇左一分鐘後，個 sales 先至話：女裝嚟架，先生。真 LOR！

若你重抗拒時代的不可逆轉大勢，重未適應現在的life style，重當MSN,SMS,E-mail,blog,computer,MP3喺洪水猛獸，繼續用"walkman"听歌，影菲林相和飛鴿傳書的話，就好難同下一代溝通啦。

其實學吓新野轉吓 look 都幾好，最緊要喺唔好令個腦便秘，要開通啲，肯接受新事物新思維，只要 filter 吓，好嘅就學，衰嘅就閃，有內涵重要配合適切嘅 presentation 架，咁就為之與時並進，好多野睇真啲都喺新瓶舊酒嚟啫。喺咪唔能夠接納自我？Oh,no,「自我」都要心意更新家嗎！睇吓譚校長同劉華撈左咁多年都有市塲，努力啲啦，唔喺好似我咁淨喺改過髮形就掂o架！

人在變，世界在變；但上帝永不變，衪要求我們的也不變，就是「盡心、盡性、盡意，盡力愛主你的神」

落堂，Good-Bye Hung Sir.